Colossians 4
1Diiꞌ tanata nkonuka, teing diikaning diiꞌkoo mintoomparimaing makosinaꞌ tampaꞌ nkovererimaatoai, eeꞌ noruꞌeri, “Niiꞌ teeꞌke niikaang Tanata-nko paning-koo otoꞌmemuring.”Kunsiarama Matauari Otoꞌnaꞌ
2Kunsi-koo uaaroriaꞌ otoai onou tanterariri Kumponing-koo tampaꞌ tamperima. 3Eeꞌnoko niiꞌ kunsi-koo pakumererimaatoai, Kumponinge niiꞌ karanaang daateꞌmemuriiꞌnaang tee doorenang tampara Karistooꞌ bakaang tero bakuꞌari otokoꞌnung daankiampiainaꞌ, tee tenaare aaꞌnaare ning anke kiimatamari oꞌnong. 4Napoꞌ ning kunsi-koo pakumeriai ninge tee kara tampaꞌ sirakaꞌantavampainaꞌ teeꞌ ninge minku-koo makosinaꞌ minkuama.5Teing ninka mutaanang-nupoong ninka otori mataurariri nanirimaatoai batei tamung keraꞌperiaꞌ. 6Kara-koo mataurariri nariꞌ karerima arooꞌantanaꞌ karerimaatoai, eeꞌnoko makuꞌerima toꞌbiirariri karerimaatoainaꞌ.
Tikikas Naanka Onesimas Karavoto~ Nkara
7Tikikasie tampaꞌ naururiaing diiꞌ teing ookara kapooꞌ ninge nkoamaing. Tee aung Tikikas tee niiꞌmaikoꞌ masikung, tee niiꞌ ninka nariꞌ Ovoring bakaang botovotonaaꞌ kakeꞌiiari mintoomparamaung Ovoring-koo. 8Ninge diiꞌanko botoamaang diiꞌke niiꞌ oꞌnorinaꞌ noruꞌeriiꞌnaang eeꞌnoko teie diiꞌ napoꞌ kuaaꞌantaruriai diikaang domang. 9Napoꞌ Onesimas nariꞌ Tikikas ninka botoamaang, tee napoꞌ teeꞌke tee narung niiꞌmaikoꞌ kakeꞌiinung, tee diikanavuntuꞌnung narung. Tenaankai nauraariaing kapooꞌ ookara anke nkoaramaing.Siꞌnooraꞌnaare
10Aristakasie tampaꞌ tang botovumaang diiꞌanko teie niꞌninka kiimatanava-koo nariꞌ oꞌnoremaunge, napoꞌ teie Maakaꞌke, Baanabas baaraꞌmaꞌnunge, tampara tampumang diiꞌkoo. Tee aung Maakaꞌ tee diiꞌanko beko tee tampaꞌ onkeonkeꞌeriaing teeꞌ naurampiruꞌnaꞌ. 11Narung napoꞌ teie Jiisuuꞌ Jasitasie tampaꞌ tang diiꞌanko botovumaang. Anaanka nanaanka Juꞌkoonaanka masikaanka teing-koo mintoong-koo pakumaarimaing-koo Kumponing bakaang muuꞌ kani-anta-koo. Tenaanka mmarang-koonaanka deempareko nariꞌ oꞌnoritaaꞌ tampaꞌ mantomaramaung. 12Napoꞌ diikanavuntuꞌnunge Epaparasie diiꞌanko tampaꞌ tang botovumaang, teie Jiisuuꞌ Karistooꞌ bakaang botovotonaaꞌke. Teie tee diiꞌ kunsi-koo aaꞌnaꞌ iriꞌoi pakururimaung, diiꞌ purintariri otoriiꞌnaang petaaꞌdori, eeꞌnoko Kumponing bakaang pia koontoꞌ tasiꞌperiai diiꞌke. 13Ninge tee tampaꞌ masikaꞌ noruꞌansi oꞌnong tee, teeꞌkoo ninge eeꞌ naurampimang: Tee tee bakei poreꞌomaung diiꞌ Kolosi-nupoong tovang paku-koo, Leodesiaꞌnupoong eeꞌnoko Aiaapolis-nupoong. 14Napoꞌ teie Luukeꞌke niikaang dokutai domang-eta aaꞌnaꞌ piaavampimaunge Dimas ninka nariꞌ tampaꞌ tampuremaang diiꞌkoo. 15Enang tee diiꞌke nkaang tampaꞌ tang teing niiꞌmaikororiꞌ Leodesiaꞌke otoromaing nauereriaing eeꞌnoko teni Nimpa teing ninka nariꞌ bakanava-koo dootuuꞌarimaing ninka.16Aung aneꞌ karavoto deeruaako taareveriraiꞌnange diiꞌke napoꞌ dootuuꞌnupoong Leodesiaꞌke otoromaing-aape botoveriai teinge napoꞌ deeruaavainaꞌ, eeꞌnoko napoꞌ teneꞌ Leodesiaꞌaape botoantuꞌnaneꞌ teeꞌke, diiꞌke napoꞌ deerueriai. 17Eeꞌnoko Akipas nauerima aaꞌperiai, “Dake tee nko-nko Ovoringe aruuꞌnung tampaꞌ dupe-antaveaing.”
18Aung tee anairu karavoto-koo basinairu ninge ninka aneꞌ kompansi nkaang birenge daariamang tampaꞌ tang botoanko nkaang taaꞌniꞌanta ooverira tasiꞌmemuriiꞌnaang. Kunsi-koo norunoruꞌmerimatoai, aiꞌ ning tee kiimata-koo sieenai daiꞌmari oꞌnong.
Tee biraanke tee diiꞌ ninka nariꞌ otoaing. Eeꞌ, teeꞌ nariꞌ.
Copyright information for
NAS